ಏಕೆ ಈ ವೈಪರೀತ್ಯ?
ಇಲ್ಲಿ ಮದುವೆಮನೆಯಲ್ಲಿ
ಅಬ್ಬರದಿಂದ ನಡೆದಿದೆ
ಭೂರಿ ಭೋಜನ;
ಅಲ್ಲಿ, ಪಕ್ಕದ
ಗುಡಿಸಿಲುಗಳ ಸಾಲಿನಲಿ
ಒಪ್ಪತ್ತಿಗೂ ಇಲ್ಲ
ತಂಗಳನ್ನ.
ಇಲ್ಲಿ ಎಲೆಗಳ ತುಂಬ
ತರತರದ ಅನ್ನ, ಪಲ್ಲೆಗಳು,
ವಿಭಿನ್ನ ಸಿಹಿತಿಂಡಿಗಳು;
ಅಲ್ಲೊ, ತಿನ್ನಲೇನೂ ಇಲ್ಲ,
ತುಂಬಿಸಲು ಎಲೆಯೇ ಇಲ್ಲ
ಖಾಲಿಖಾಲಿ ಪಾತ್ರೆಗಳು.
ಊಟ ಮುಗಿದರೂ
ಇಲ್ಲಿ ಎಲೆಯಲ್ಲಿ
ಖಾಲಿಯೇ ಆಗಿಲ್ಲ;
ಅಲ್ಲಿ ತಿಂದರೂ,
ಎಲೆ ಖಾಲಿಯಾದರೂ
ಹಸಿವು ಹಿಂಗಿಲ್ಲ.
ಹೊಟ್ಟೆ ತುಂಬಿದವರು
ಬಿಟ್ಟುಂಡ ಎಲೆಯಲ್ಲಿ
ನಾಕಾರು ಜನ ತಿನ್ನಬಹುದು;
ಹಸಿವಾದ ಜನರು
ತಿಂದುಂಡು ಎಲೆಯಲ್ಲಿ
ನೊಣಕೂ ಆಹಾರ ಸಿಗದು.
ಏಕೆ ಈ ವಿಪರೀತ?
ಏಕೆ ಈ ವೈಪರೀತ್ಯ?
ಉತ್ತರವ ಹೇಳುವವರಾರು?
No comments:
Post a Comment