ಪುಟಾಣಿ ಕಥೆಗಳು 11- 16

ಪುಟಾಣಿ ಕಥೆ - ೧೧

"ನೀ ನನ್ನ ಬಿಟ್ಟರೆ ಸಾವೇ ಗತಿ" ಅವಳು ಹೇಳಿದಳು. 

"ನಿನ್ನ ಬಿಟ್ಟು ನನಗೆ ಬದುಕಲು ಸಾಧ್ಯವೇ ಇಲ್ಲ" ಎಂದ ಅವನು.
ಅವರಿಬ್ಬರೂ ಈಗ ಬದುಕಿದ್ದಾರೆ, ಆದರೆ ಒಟ್ಟಿಗಲ್ಲ!
    

 ಪುಟಾಣಿ ಕಥೆ - 12

ಹೊರಗೆ ಹೋಗಿ ನೇರ ಮನೆಗೇ ಬಾ ಕಂದ."
"ಅಡ್ಡ ದಾರಿ ಹಿಡಿಯಲು ನಾನು ಮನುಷ್ಯನೇನಮ್ಮ?" ಕೇಳಿತು ಕತ್ತೆಮರಿ.
   

ಪುಟಾಣಿ ಕಥೆ -13

ಹರಿಶ್ಚಂದ್ರ ಘಾಟ್ ಬಸ್ ನಿಲ್ದಾಣದಲ್ಲಿ ಇಳಿಯುತ್ತಿದ್ದ ಅಜ್ಜಿಯನ್ನು ಕಂಡು ಕಿಸಕ್ಕೆಂದು ನಕ್ಕ ಯುವಕ. 

"ಎಲ್ಲರೂ ಒಂದಲ್ಲ ಒಂದು ದಿನ ಇಲ್ಲಿಗೆ ಬರಲೇಬೇಕಪ್ಪ " ನಗುತ್ತಾ ಇಳಿದುಹೋದರು ಅಜ್ಜಿ

ಪುಟಾಣಿ ಕಥೆ - 14

"ಅಮ್ಮ, ನನಗೆ ದೊಡ್ಡ ಶಿಕ್ಷೆ ಕೊಡು, ನಾನು ದೊಡ್ಡ ತಪ್ಪು ಮಾಡಿದ್ದೇನೆ." ಕಂದನನ್ನು ಅಪ್ಪಿ, ಹಣೆಗೊಂದು ಹೂಮುತ್ತನಿತ್ತು ಹೇಳಿದಳು ಅಮ್ಮ, "ಈಗ ಹೇಳು ಅದೇನು ತಪ್ಪು? "

ಪುಟಾಣಿ ಕಥೆ -  15

ತಾಯಿಗೆ ನೋವಾಯಿತೆಂದು ಮಗಳು, 

ಮಗಳಿಗೆ ಎಷ್ಟು ನೋವಾಗಿದೆಯಲ್ಲ ಎಂದು ತಾಯಿ, 

ಇಬ್ಬರೂ ಸುರಿಸಿದ ಕಣ್ಣೀರಿಗೆ ಕತ್ತಲೊಂದೇ ಸಾಕ್ಷಿಯಾಗಿತ್ತು

ಪುಟಾಣಿ ಕಥೆ - 16

"ನಾನು ನಿನಗೆ ಭಾರವಾಗಿರೋಲ್ಲ, ನನ್ನನ್ನು ವೃದ್ಧಾಶ್ರಮಕ್ಕೆ ಕಳಿಸಿಬಿಡು. "
"ನೀನೂ ನನ್ನ ಬಗ್ಗೆ ಹಾಗೇ ಅಂದುಕೊಂಡಿದ್ದರೆ ನಾನು ಈಗ ಇರುತ್ತಿದ್ದೆನಾ,  ಅಮ್ಮ?"
         

ಪುಟಾಣಿ ಕಥೆಗಳು 1-10

ಪುಟಾಣಿ ಕಥೆ -೧

ಮಚ್ಚನ್ನು ಹಿಡಿದು ಕನ್ನಡ ಕಲಿಯಿರಿ ಇಲ್ಲದಿದ್ದರೆ ಕೊಚ್ಚಿ ಹಾಕುತ್ತೇವೆ ಎನ್ನುತ್ತಿದ್ದರು ದೊಡ್ಡವರು. ಆದರೂ ಯಾರೂ ಕನ್ನಡ ಕಲಿಯಲಿಲ್ಲ.

ಅಲ್ಲೊಬ್ಬ ಕಿರಿಯನಿಗೆ ಇನ್ನೊಬ್ಬ  ಕಿರಿಯ ಹೇಳುತ್ತಿದ್ದ - "ನಿನ್ನ ಮಾತು ಸತ್ಯ ಕಣೊ. ನೆನ್ನೆ ಕನ್ನಡ ಪದಗಳನ್ನು ಕಲಿತದ್ದರಿಂದ ಇಂದು ಕಡಲೆಕಾಯಿ ಬುಟ್ಟಿ ಪೂರ್ತಿ ಖಾಲಿಯಾಯಿತು. ನೋಡಿಲ್ಲಿ" ಕೈತುಂಬ ಹಣ ತೋರಿಸಿದ.

ಪುಟಾಣಿ ಕಥೆ - ೨

ಸಾಯಲು ಹೊರಟವನಿಗೆ ಬಾವಿ ಸಿಗಲಿಲ್ಲ. 

ಬಾವಿ ತೋಡಲಾರಂಭಿಸಿದ. 

ಸುಮಾರು ದಿನಗಳ ನಂತರ ನೀರು ಚಿಮ್ಮಿತು. 

ಹಾಗೇ ಅವನಿಗೆ ಬದುಕಿನ ಬಗ್ಗೆ ಪ್ರೀತಿ ಸಹ.

ಪುಟಾಣಿ ಕಥೆ - ೩

ಅಪ್ಪ ಅಮ್ಮನ ಮಾತಿನಿಂದ ಪಾಠ ಕಲಿಯದವನು 

ಬದುಕಿನ ಹೊಡೆತಗಳಿಂದ ಪಾಠ ಕಲಿಯಲೇಬೇಕಾಗುತ್ತದೆ 

ಎಂಬುದನ್ನು ಅರಿಯುವ ಮುನ್ನವೇ ಅವನು ದೊಡ್ಡವನಾಗಿಬಿಟ್ಟಿದ್ದ..
 

ಪುಟಾಣಿ ಕಥೆ -೪

ಮುಟ್ಟಿದರೆ ಮುನಿ ಆಕೆ. 

ನಾನಿತ್ತದ್ದು ಒಂದು ಹನಿ ಪ್ರೀತಿ. 

ಆಕೆ ಅಮೃತದ ಕಲಶವನೇ ಹೊತ್ತು ತಂದಳು.

 ಪುಟಾಣಿ ಕಥೆ - ೫

ಇಬ್ಬರ ನಡುವೆ ಮೌನವಿತ್ತು.  

ಅಹಂಕಾರವೆಂದುಕೊಂಡಳು ಒಬ್ಬಳು. 

ಉದಾಸೀನವೆಂದುಕೊಂಡಳು ಇನ್ನೊಬ್ಬಳು. 

ಆಕಸ್ಮಿಕವಾಗಿ ಮಾತನಾಡುವ ಸಂದರ್ಭ ಬಂತು. 

ಈಗ ಅವರಿಬ್ಬರೂ ಆತ್ಮೀಯ ಗೆಳತಿಯರು.

 ಪುಟಾಣಿ ಕಥೆ - ೬

"ಹುಡುಗನಿಗಾಗಿ ಜೀವ ಕೊಟ್ಟೆ," ಒಂದು ಹುಡುಗಿ ಹೇಳಿದಳು. 

"ಬದುಕಲಾಗದೆ ಜೀವ ಕೊಟ್ಟೆ" ಇನ್ನೋರ್ವನ ಉವಾಚ.
"ಒಂದು ಸದುದ್ದೇಶಕ್ಕಾಗಿ ಜೀವ ಕೊಟ್ಟಿದ್ದರೆ ನಮಗಿಂಥಾ ಪರಿಸ್ಥಿತಿ ಬರುತ್ತಿರಲಿಲ್ಲ"  ಮರಕ್ಕೆ ತೂಗಾಡುತ್ತಾ ಹೇಳಿತಾ ದೆವ್ವ.
   

ಪುಟಾಣಿ ಕಥೆ - ೭

ಅಬ್ಬಾ ಎಷ್ಟೊಂದು ಓದಿಬಿಟ್ಟಿರುವೆ, ಇನ್ನು ಓದುವುದು ಸಾಕೆಂದುಕೊಂಡಳು. ಶಾಲೆಯಿಂದ ಬಂದ ತಕ್ಷಣ ಮಗಳು ಕೇಳಿದ ಪ್ರಶ್ನೆಗೆ ತಲೆಕೆಡಿಸಿಕೊಂಡು ಮತ್ತೆ ಪುಸ್ತಕ ತೆರೆದಳು!
 

ಪುಟಾಣಿ ಕಥೆ - ೮

ಮಗಳನ್ನು ಓದಿಗಾಗಿ ವಿದೇಶಕ್ಕೆ ಕಳಿಸಿ ಮನೆಗೆ ಬಂದ ತಕ್ಷಣವೇ ಫೋನ್ ಕರೆ. "ಮೇಡಮ್ ಇಂದು ಬಂದು ಎರಡನೇ ಮಗುವನ್ನು ಕರೆದುಕೊಂಡು ಹೋಗಬಹುದು." ಅನಾಥಾಶ್ರಮದ ಕರೆ!
     

ಪುಟಾಣಿ ಕಥೆ - ೯

ಹೆಣಭಾರ ಹೊತ್ತು  ಬದುಕಬಂಡಿ ಸಾಗಿಸಲು ಯತ್ನಿಸುತ್ತಿದ್ದ ತಾಯಿ ಪಕ್ಕದಲ್ಲಿ ನಡೆಯಲಾರಂಭಿಸಿದಳು 6 ವರ್ಷದ ಪುಟ್ಟ ಬಾಲೆ. 

"ಒಬ್ಬರು ಜೊತೆಗಿದ್ದರೆ ನಿನಗೆ ಸ್ವಲ್ಪ ಹಾಯೆನಿಸಿತ್ತದೆ, ಅಲ್ಲವೇನಮ್ಮ?"
  

ಪುಟಾಣಿ ಕಥೆ - ೧೦

ಆಗ ಆ ಮನೆ ತುಂಬ ಮಕ್ಕಳಿದ್ದರು.  ಈಗ ಆಕೆ ಒಬ್ಬಂಟಿ.
ಆಗ ಈ ಮನೆಯಲ್ಲಿ ಮಕ್ಕಳಿರಲಿಲ್ಲ. ನಂತರ ಎಲ್ಲೆಲ್ಲಿಂದಲೋ ಬಂದರು. ಈಗ ಆ ಮನೆಯಲ್ಲಿ ಜಾಗವೇ ಇಲ್ಲ!